ياللي بأساليب الخيانه تفننت
وش رجعك عقب الجفا والقطاعه ؟؟
فارق عيوني وابعد ارجوك لاهنت
دامك تصنعت المشاعر صناعه
لعبت لعباتك بتمثيل واتقنت
وألفت كذباتك بفن وبراعه
وخليتني بالنار يومك تمكنت
وقعدت ادور في هواك الشفاعه
لان الحجر من حالتي وانت مالنت
لأني اعطيتك غلا عن قناعه
غدرت بي واخلفت ضني بك وخنت
وخذيت حبي لك مجرد اشاعه
لاتقول ابرجع باللهوى مثل ماكنت
ضاع الهوى وانت السبب في ضياعه
يوم اني اسهر اليل وين انت
يوم اتحرى جيتك كل ساعه
ياللي مع الأيام ضدي تلونت
يا من تفنن في وسايل خداعه
بك من تواصيف الغدر لامن تمسكنت
كنه اخوك من الصدر والرضاعه
يالمعدن اللي حكك الوقت بينت
بيَن صداك اللي خذيته بضاعه
ربتني الدنيا على يديك وايقنت
ان ماكل من يطمح طموح استطاعه
اليوم عقب اللي جرالي تمنعت
والحر بعيونه يبين انطباعه
كانك مع العذال وهمي تعاونت
عندي شهاده بالصبر والشجاعه
وان كانك اسلوب التحدي لي اعلنت
ابشر برجالٍ يشمر ذراعه
انا طبعي وبأطباعي آمنت
من عافنا يحرم علينا اتباعه
والي معي صادق بعيني له اسكنت
عندي عن اسلوب الخيانه مناعه
تدري ؟؟ مدامك للهوى اليوم ما صنت
اقولها بوجهك وكلي قناعه
يلعن ابو رجلٍ يذله هوى بنت
اذا تخلى لأجلها عن طباعه
